प्रहरी महानिरीक्षक दान बहादुर कार्की दर्ज्यानी चिन्हबाट सुशोभित, नेतृत्वमा नयाँ ऊर्जा

काठमाडौं, कात्तिक २७ — नेपाल प्रहरीको सर्वोच्च नेतृत्वमा नयाँ ऊर्जा थपिएको छ। मन्त्रिपरिषद्को निर्णयअनुसार नवनियुक्त प्रहरी महानिरीक्षक (IGP) दान बहादुर कार्की बिहीबार सिंहदरबारस्थित गृह मन्त्रालयमा आयोजित विशेष समारोहबीच दर्ज्यानी चिन्हबाट सुशोभितहुनुभयो।

गृहसचिव रामेश्वर दंगालले प्रहरी महानिरीक्षक कार्कीलाई चिन्ह लगाउँदै देशमा शान्ति–सुरक्षा, सुशासन र निष्पक्ष निर्वाचन सुनिश्चित गर्न नयाँ नेतृत्वबाट असाधारण परिणाम आउने विश्वास व्यक्त गर्नुभयो।

“नेपाल सरकारले विधि र पद्धतिका आधारमा प्रहरी संगठनको नेतृत्व प्रदान गरेको हो। कार्कीको कार्यकालमा संगठनले अझ सशक्त रूप लिनेछ,”
– गृहसचिव दंगाल

दर्ज्यानी चिन्ह ग्रहणपछि IGP कार्कीले आफ्नो कार्यकक्षमा पदबहाली गर्दै देश र नागरिकप्रतिको दायित्वलाई पारदर्शीता, जवाफदेहिता र सेवा भाव सहित पूरा गर्ने दृढ प्रतिवद्धता जनाउनुभयो।

“यो जिम्मेवारी सम्मान मात्र होइन, ठूलो उत्तरदायित्व हो। म संगठनको मनोबल र जनविश्वास दुवै बलियो बनाउनेछु,”
– प्रहरी महानिरीक्षक दान बहादुर कार्की

कार्यक्रममा राष्ट्रिय अनुसन्धान विभागका प्रमुख, प्रहरी अतिरिक्त महानिरीक्षकहरू, वरिष्ठ प्रहरी अधिकारीहरू र सञ्चारकर्मीहरूको उपस्थिति थियो।

प्रहरी महानिरीक्षक कार्की : सेवाबाट नेतृत्वसम्मको प्रेरक यात्रा

गुल्मीको मालिका गाउँपालिका–७ निवासी कार्की २०५४ चैत १८ गते प्रहरी निरीक्षकबाट सेवामा प्रवेश गर्नुभएको थियो। साहसी, इमानदार र कर्तव्यनिष्ठ अधिकृतको रूपमा परिचित उहाँ २८ वर्षको सेवायात्रा पार गर्दै अहिले नेपाल प्रहरीका ३३औं महानिरीक्षक बन्नुभएको हो।

राजनीतिशास्त्रमा स्नातकोत्तर गर्नुभएका कार्कीले २२ वटा राष्ट्रिय तथा अन्तर्राष्ट्रिय तालिम पूरा गर्नुभएको छ। उहाँ प्रवल जनसेवा श्री र संयुक्त राष्ट्रसंघ पदक सहितका विभूषणले सम्मानित हुनुहुन्छ।

जनविश्वासको प्रहरी : कार्कीको दृष्टिकोण

• सुशासन र भयरहित वातावरणमा निर्वाचन सम्पन्न

• विकृति–विसंगति अन्त्य गरी पारदर्शी प्रणाली विकास

• प्रहरी संगठनभित्र सुधार र मनोबल सुदृढीकरण

• समुदायसँगको सहकार्यद्वारा अपराध नियन्त्रण

कार्यकक्ष प्रवेश र श्रद्धाञ्जली

दर्ज्यानी चिन्ह ग्रहणपछि IGP कार्कीले नेपाल प्रहरी प्रधान कार्यालय पुगेर अमर प्रहरी स्मारकमा पुष्पहार चढाई श्रद्धाञ्जली अर्पण गर्नुभयो। उहाँलाई स्वागत गर्न प्रहरी अधिकृतहरू र जवानहरूको लामो पंक्ति उभिएको दृश्यले संगठनभित्रको एकता र उत्साह झल्कायो।

नयाँ नेतृत्व, नयाँ दिशा — दान बहादुर कार्कीको नेतृत्वमा नेपाल प्रहरीको यात्रा अब जनविश्वास र सुशासनतर्फ!