न्यूजिल्याण्ड पठाइदिन्छु भन्दै १४ लाख ठग्ने व्यक्ति पक्राउ

काठमाडौं, २६ कात्तिक

“न्यूजिल्याण्ड पठाइदिन्छु” भनेर वैदेशिक रोजगारको लोभ देखाउँदै ठगी गर्ने एक व्यक्ति पक्राउ परेका छन्।

काठमाडौं महानगरपालिका–३२ बस्ने ४५ वर्षीय पुरूषोत्तम भण्डारी (स्थायी ठेगाना: दोलखा भिमेश्वर–८) ले एक पीडितसँग १४ लाख रुपैयाँलिएर सम्पर्कविहीन भएका थिए।

पीडितले उजुरी दिएपछि काठमाडौं उपत्यका अपराध अनुसन्धान कार्यालय, टेकुबाट खटिएको टोलीले उनलाई मंगलबार काठमाडौंमै समातेको हो।

पक्राउ परेका भण्डारीलाई थप अनुसन्धान र कारबाहीका लागि वैदेशिक रोजगार विभाग, ताहाचलमा बुझाइएको प्रहरीले जनाएको छ।

प्रहरीको चेतावनी

“विदेश पठाइदिन्छु” भन्ने प्रलोभनमा नपर्न सबैलाई अनुरोध गरिएको छ। वैदेशिक रोजगारीका नाममा हुने यस्ता ठगीका घटनाहरू तीव्र गतिमा बढ्दै गएकाले प्रहरीले निरन्तर निगरानी गरिरहेको जनाएको छ।