सावधान: भारतमा बनेको न्यूनचापीय प्रणालीको असर नेपालमा, तराईका चार प्रदेशमा तीव्र हावाहुरीको जोखिम!

काठमाडौँ, भारतको उत्तर प्रदेश आसपास बनेको न्यूनचापीय क्षेत्रका कारण नेपालको तल्लो वायुमण्डल प्रभावित भएको छ। यसकै असरस्वरूप हाल मधेस, बागमती, गण्डकी र लुम्बिनी प्रदेशका तराई भू-भागमा तीव्र गतिमा हावाहुरी चलिरहेको मौसम पूर्वानुमान महाशाखाले जनाएको छ।

मौसमविद्का अनुसार यो मौसमी प्रणालीको प्रभाव आज राति मात्र नभई आइतबार दिउँसोसम्म कायम रहनेछ। विशेष गरी आइतबार दिउँसो लुम्बिनी र सुदूरपश्चिम प्रदेशका तराई क्षेत्रमा ठुलो हावाहुरी चल्ने सम्भावना रहेकाले सर्वसाधारणलाई आवश्यक सतर्कता अपनाउन आग्रह गरिएको छ।

हावाहुरीका साथै देशका विभिन्न भागमा वर्षाको प्रभाव पनि देखिएको छ। गण्डकी, लुम्बिनी, कर्णाली र सुदूरपश्चिमका धेरै स्थानमा मध्यम वर्षा भएको छ भने कोशी र बागमती प्रदेशका केही स्थानमा हल्का वर्षा दर्ता गरिएको छ।