तार्केश्वर नगरपालिकाको विशेष सचेतना: चाडपर्वमा खानपानमा विशेष सावधानी अपनाउन नगरवासीलाई आग्रह!

महान चाडपर्वको अवसरमा शुभकामना तथा खानपानमा विशेष सचेतना सम्बन्धी सार्वजनिक सूचना

आदरणीय नगरवासी दाजुभाइ तथा दिदीबहिनीहरू!

यस वर्षको नेपालीहरूको महान चाडपर्वहरू बडा दशैं, दिपावली (तिहार), छठ पर्व, साथै नेपाल संवत् ११४५ को उपलक्ष्यमा तार्केश्वर नगरपालिका परिवारको तर्फबाट सम्पूर्ण नगरवासी, देश विदेशमा रहनुभएका नेपाली दाजुभाइ तथा दिदीबहिनीहरूमा हार्दिक मंगलमय शुभकामना व्यक्त गर्दछौं। यी पर्वहरूले हामी बीचको आपसी सद्भाव, भ्रातृत्व, एकता र मेलमिलापलाई अझ प्रगाढ बनाउन मद्दत गरुन् भन्ने कामना गर्दछौं।

चाडपर्व भन्नासाथ खुसीयाली, रमाइलो र विभिन्न परिकारका स्वादिष्ट भोजनहरू पनि जोडिएर आउँछन्। यद्यपि, यो वर्ष लगातार यी ठूला पर्वहरू एकै समयमा पर्न गएको कारणले गर्दा, हाम्रो खानपान र जीवनशैलीमा असावधानी हुन सक्ने जोखिम देखिएको छ। निरन्तरको उत्सवमय माहोल र तामसी भोजनले हाम्रो स्वास्थ्यमा प्रतिकूल असर पार्न सक्ने भएकोले, “स्वस्थ चाडपर्व, स्वस्थ जीवन” भन्ने मूल मन्त्रलाई आत्मसात गर्दै सम्पूर्णमा निम्न कुराहरूमा विशेष ध्यान पु¥याउनुहुन हार्दिक अनुरोध गरिन्छ:

१. स्वच्छ र सन्तुलित आहार: पर्वको बेला भएपनि सन्तुलित भोजनमा जोड दिनुहोस्। बासी, सडेगलेको वा बजारमा खुला रूपमा राखिएका खाद्य पदार्थहरूको सेवन नगर्नुहोस्। घरमै बनेको ताजा र सात्विक भोजनलाई प्राथमिकता दिनुहोस्।

२. मिठाई तथा चिल्लो पदार्थमा नियन्त्रण: धेरै गुलियो, चिल्लो, मसलेदार र तारेका खानेकुराहरूको अत्यधिक सेवनबाट टाढै रहनुहोस्। यसले उच्च रक्तचाप, मधुमेह, र पेट सम्बन्धी समस्याहरू (अपच, ग्यास्ट्रिक) निम्त्याउन सक्छ।

३. पानीको पर्याप्त सेवन: चाडपर्वको व्यस्ततामा पानी पिउन बिर्सिन सकिन्छ। दिनहुँ पर्याप्त मात्रामा सफा र उमालेको पानी पिउनुहोस्, जसले शरीरलाई निर्जलीकरण (dehydration) हुनबाट बचाउँछ र पाचन प्रक्रियालाई सघाउँछ।

४. मासुको सुरक्षित प्रयोग: मासुजन्य परिकारहरू बनाउँदा मासु राम्ररी पकाएको छ कि छैन यकिन गर्नुहोस्। काँचो वा अर्धकाँचो मासुले स्वास्थ्यमा गम्भीर समस्या ल्याउन सक्छ। साथै, मासुको सरसफाइमा विशेष ध्यान दिनुहोस्।

५. अल्कोहल र सुर्तीजन्य पदार्थको निषेध: चाडपर्वको नाममा अत्यधिक मद्यपान, धुम्रपान र सुर्तीजन्य पदार्थको सेवन नगर्नुहोला। यस्ता लतहरूले तपाईंको मात्र नभई पूरै परिवारको खुसीलाई क्षति पु¥याउन सक्छ।

६. बालबालिका र ज्येष्ठ नागरिकको ख्याल: चाडपर्वको यो समयमा घरका बालबालिका र ज्येष्ठ नागरिकहरूको खानपान र आराममा विशेष ध्यान दिनुहोस्।

चाडपर्व रमाइलोसँग मनाऔं, तर आफ्नो र आफ्नो परिवारको स्वास्थ्यलाई पहिलो प्राथमिकतामा राखौं। बेलैमा सतर्कता अपनायौं भने मात्रै हामी यी पर्वहरूको वास्तविक आनन्द लिन सक्नेछौं।

तपाईंको चाडपर्वहरू सुरक्षित, सुखमय र स्वास्थ्यवर्धक रहून्!

शुभकामना सहित,
तार्केश्वर नगरपालिका नगर कार्यपालिकाको कार्यालय
धर्मस्थली, काठमाडौं
बागमती प्रदेश, नेपाल