मन छुने पारिवारिक कथा, अटिजमप्रतिको सकारात्मक सोच : ‘पार्वती’

काठमाडौं । नेपालभरिका हलहरूमा प्रदर्शन भइरहेको नयाँ चलचित्र ‘पार्वती’ केवल मनोरञ्जनका लागि बनेको चलचित्र मात्र नभई संवेदनशील सामाजिक विषयलाई उजागर गर्ने सार्थक र प्रेरणादायी फिल्मका रूपमा प्रस्तुत भएको छ। समाजमा अझै पनि पर्याप्त बुझाइ र सचेतना हुन नसकेको अटिजम जस्तो संवेदनशील विषयलाई चलचित्रले प्रभावकारी रूपमा पर्दामा उतारेको छ।

चलचित्रले अटिजम भएका बालबालिकाको अवस्था, उनीहरूले भोग्नुपर्ने चुनौती, उपचार तथा थेरापीको प्रक्रिया र परिवार तथा समाजको सहयोगबाट उनीहरूको जीवनमा ल्याउन सकिने सकारात्मक परिवर्तनलाई कथामार्फत प्रस्तुत गरेको छ।

चलचित्रको मुख्य सन्देश अटिजमलाई अभिशापका रूपमा नहेरी समयमै पहिचान, उचित उपचार, आवश्यक थेरापी तथा पारिवारिक सहयोग र मायामार्फत बालबालिकाको जीवनमा सकारात्मक परिवर्तन ल्याउन सकिन्छ भन्ने रहेको छ। विशेषगरी, बालबालिकाको विकास र आत्मविश्वासमा घरपरिवारको माया, साथ र स्वीकार्यता कति महत्वपूर्ण हुन्छ भन्ने पक्षलाई चलचित्रले भावनात्मक रूपमा प्रस्तुत गरेको छ।

परिवारभित्रको सद्भाव, धैर्य र स्नेहले जटिल परिस्थितिमा पनि आशाको नयाँ बाटो खोल्न सक्छ भन्ने सन्देश चलचित्रले दिएको छ। अटिजम भएका बालबालिकालाई समाजबाट अलग राख्नुको सट्टा उनीहरूलाई बुझ्ने, स्वीकार गर्ने र आवश्यक सहयोग प्रदान गर्ने वातावरण निर्माण गर्नुपर्ने विषयमा पनि चलचित्रले दर्शकलाई सोच्न बाध्य बनाउँछ।

चलचित्रको अर्को प्रमुख आकर्षण निता ढुङ्गाना (अधिकारी) को अभिनय हो। उनले आफ्नो भूमिकामा अभिभावकको पीडा, संघर्ष, त्याग, माया र आशालाई जीवन्त रूपमा प्रस्तुत गरेकी छन्। उनको स्वाभाविक र भावनात्मक अभिनयले कथालाई थप प्रभावशाली बनाएको छ।

विशेषगरी, सन्तानको अवस्थाका कारण अभिभावकले भोग्ने मानसिक पीडा र उनीहरूको भविष्यप्रतिको चिन्तालाई निताले पर्दामा निकै सशक्त ढंगले प्रस्तुत गरेकी छन्। उनका अभिनयका कतिपय दृश्यले दर्शकलाई भावुक बनाउने मात्र होइन, अभिभावक र सन्तानबीचको सम्बन्धको गहिराइलाई समेत अनुभूति गराउँछ।

‘पार्वती’ मनोरञ्जनसँगै सामाजिक चेतना र पारिवारिक संवेदनालाई जोड्ने चलचित्रका रूपमा प्रस्तुत भएको छ। अटिजमबारे सामान्य बुझाइ विस्तार गर्न तथा विशेष आवश्यकता भएका बालबालिकाप्रति परिवार र समाजको दृष्टिकोण सकारात्मक बनाउन चलचित्रले महत्वपूर्ण भूमिका खेल्न सक्ने देखिन्छ।

आफ्ना बालबालिका तथा परिवारसँगै हेर्न सकिने एउटा सार्थक, संवेदनशील र सन्देशमूलक चलचित्र खोजिरहनुभएको छ भने ‘पार्वती’ एक उपयुक्त रोजाइ बन्न सक्छ। चलचित्रले दर्शकलाई मनोरञ्जनसँगै परिवारप्रतिको माया, जिम्मेवारी र स्वीकार्यताको महत्वबारे सोच्न प्रेरित गर्नेछ।