यादका पिरामिडहरू : बसन्त चौधरी

यादका पिरामिडहरू

प्रत्येक क्षण
अनन्तमा परिणत हुँदा
मिठासमा बग्ने मुटुको धुन
गुनगुनाउन बिर्सेको छु
जीवनको समवेदनालाई
लयबद्ध पीडामा विघटन गर्दै
धेरै वर्ष बिताइसकेको छु

बिताइसकेको छु
चिसा, फिक्का र निरश चन्द्रमा र ताराहरू हेरेर
कोपिलाहरु फक्रेर फूल बनेको कहिल्यै नदेखेरै
एक्लै एक्लै !

अचेल एक्लै छु
तिमी गएपछि बेग्लै छु
आशाको चिमनीबाट धुवाँ बनेर उडिरहेको
अथवा मौन क्रन्दनमा बाहिर मुस्कुराएको

सम्हालेर मन
प्रेमिल याद
निस्वासमा उर्लेका छाल
जीवनको खुल्ला किताब
अनगिन्ति कथाहरू र
साधारण पाठकहरू
यद्यपि !
तिमी नहुँदा पनि
तिमी भैरहेको आभास दिने
क्षितिज जस्तै विस्तारित तिम्रो प्रेमलाई अंगालेर
उभिरहेको जून भएको छु
डटेर अँध्यारो रातसँग
प्रिय !
एक प्रेमी हुनु यति नै काफी छैन र ?
✍🏻✍🏻 बसन्त चौधरी