हिमालयन बुलियनका ग्राहकलाई दुर्घटना बीमा, सगरमाथा लुम्बिनी इन्स्योरेन्ससँग सम्झौता

काठमाडौं । सगरमाथा लुम्बिनी इन्स्योरेन्स कम्पनी लिमिटेड (SALICO) र हिमालयन बुलियन कम्पनी लिमिटेडबीच हिमालयन बुलियनका योग्य ग्राहकहरूका लागि सामूहिक व्यक्तिगत दुर्घटना बीमा (Group Personal Accident Insurance) सेवा उपलब्ध गराउने सम्झौता भएको छ। यस रणनीतिक साझेदारीले ग्राहकहरूको वित्तीय सुरक्षालाई थप सुदृढ बनाउने विश्वास लिइएको छ।

यस सम्झौताअनुसार हिमालयन बुलियन कम्पनी लिमिटेडका ग्राहकहरूले विभिन्न तहगत श्रेणीका आधारमा दुर्घटना बीमा सुरक्षा प्राप्त गर्नेछन्। यसलाई ग्राहकहरूको आवश्यकता र छनोटका आधारमा विभिन्न चरणमा वर्गीकरण गरिएको छ।

यस बीमा योजनाअन्तर्गत प्रदान गरिने कभरेजलाई तीन फरक टियरमा विभाजन गरिएको छ, जसमा सिल्भर टियरअन्तर्गत १ लाख रुपैयाँ, गोल्ड टियरअन्तर्गत ५ लाख रुपैयाँ र प्लाटिनम टियरअन्तर्गत १० लाख रुपैयाँसम्मको दुर्घटना बीमा सुरक्षा प्रदान गरिनेछ।

सगरमाथा लुम्बिनी इन्स्योरेन्सले नेपालभरका आम नागरिकमाझ पहुँचयोग्य वित्तीय सुरक्षा तथा बीमा सेवा पुर्‍याउने उद्देश्यले यस प्रकारका कर्पोरेट सहकार्यहरूलाई निरन्तरता दिँदै आएको छ। यो साझेदारीले ग्राहकहरूको जीवन र व्यवसायलाई थप सुरक्षित र भरपर्दो बनाउन ठुलो सहयोग पुर्‍याउने अपेक्षा गरिएको छ।

तस्बिर: सगरमाथा लुम्बिनी इन्स्योरेन्स