वैदेशिक अध्ययन र रोजगारीका नाममा ठगीधन्दा: पूर्व डीआईजी रमेश खरेलद्वारा उच्च सतर्कता अपनाउन अपिल

लन्डनबाट आएको एक कल र युवाको पीडा

पूर्व डीआईजी खरेलका अनुसार बेलायत (युके) को लन्डनमा अध्ययनरत एक नेपाली विद्यार्थीले टेलिफोन गरी आफू ठगिएको पीडा सुनाएपछि उहाँले यो विषयलाई सार्वजनिक रूपमा उठाएका हुन्।

आमाबुबा तथा अभिभावकले घरजग्गा बिक्री गरेर, ऋण-धन गरेर वा मिटरब्याजीसँग रकम लिएर ठूलो सपनाका साथ छोराछोरीलाई विदेश पठाउने गरे पनि विदेश पुगेपछि विदेशीबाट भन्दा आफ्नै नेपाली दाजुभाइहरूबाट ठगिने अवस्था सिर्जना भएको खरेलले बताउनुभयो। आवास (रुम/रेन्ट) मिलाइदिने, इन्स्योरेन्स, डकुमेन्टेसन र भविष्य बनाइदिने जस्ता विभिन्न प्रलोभन र आश्वासन दिएर नेपालीले नै नेपालीलाई ठग्ने गरेको घटना दिनप्रतिदिन बढ्दै गएको प्रति उहाँले दुःखी तुल्याएको उल्लेख गर्नुभयो।

“नेपाली नै पीडित, नेपाली नै पीडक”

“विदेशी भूमिमा पुगेका सोझा नेपालीहरू विदेशीबाट होइन, आफ्नै नेपाली दाजुभाइहरूबाट ठगिएका छन्। ‘नेपाली नै पीडित र नेपाली नै पीडक’ बन्ने यो दुष्चक्र अब अन्त्य हुनुपर्छ।” — रमेशप्रसाद खरेल, पूर्व डीआईजी

नेपाल सरकार र कूटनीतिक नियोगलाई आग्रह

पूर्व डीआईजी खरेलले वैदेशिक यात्रामा निस्कनुअघि नै युवाहरूलाई सही ओरिएन्टेसन (अभिमुखीकरण) र सचेतना प्रदान गर्न नेपाल सरकारसँग माग गर्नुभएको छ। साथै, विदेशस्थित नेपाली दूतावास (एमबेसी) तथा गैरआवासीय नेपाली संघ (NRNA) जस्ता आधिकारिक संस्थाहरूले चौबीसै घण्टा नेपाली विद्यार्थी तथा श्रमिकहरूको हित र सुरक्षामा ध्यान दिनुपर्नेमा उहाँले जोड दिनुभयो।

विदेश जाने तयारीमा रहेका युवाहरूलाई कुनै पनि लोभ वा प्रलोभनमा नपरी उच्च सतर्कता (High Alert) मा बस्न र आधिकारिक माध्यमबाट मात्र प्रक्रिया अगाडि बढाउन समेत उहाँले अपिल गर्नुभएको छ।