हेटौंडाको होटलबाट खैरो हेरोइनसहित दुई युवा पक्राउ

मकवानपुर, मकवानपुरको हेटौंडामा अवैध लागूऔषध कारोबार भइरहेको आशंकामा प्रहरीले छापा मार्दा खैरो हेरोइनसहित दुई जना युवक पक्राउ परेका छन्।

हेटौंडा उपमहानगरपालिका–१९ बस्तीपुरस्थित बस्तीपुर होटल एण्ड लज बाट खैरो हेरोइन जस्तो देखिने पदार्थ करिब २२० मिलिग्राम सहित उनीहरूलाई मंगलबार बिहान पक्राउ गरिएको हो।

पक्राउ पर्नेमा हेटौंडा उपमहानगरपालिका–१२ पदमपोखरीका २४ वर्षीय सुवर्ण घलान र मनहरी गाउँपालिका–३ पालदमारका २४ वर्षीय विजय मोक्तान रहेका छन्।

जिल्ला प्रहरी कार्यालय मकवानपुर समेतबाट खटिएको प्रहरी टोलीले होटलको तलासी लिँदा उनीहरूलाई उक्त लागूऔषधसहित फेला पारी नियन्त्रणमा लिएको जनाएको छ।

घटनापछि होटल क्षेत्रमा केही समय तनावको अवस्था सिर्जना भएको बताइएको छ।
प्रहरीका अनुसार यस सम्बन्धमा थप अनुसन्धान भइरहेको छ र लागूऔषधको स्रोत तथा संजालबारे खोजी तीव्र पारिएको छ।