छुट्टाछुट्टै सवारी दुर्घटनामा सात जनाको मृत्यु

काठमाडौं, २९ साउन

​ मोरङ, विराटनगर महानगरपालिका-४ पिपल चोकस्थित सडकमा विराटनगरबाट इटहरीतर्फ जाँदै गरेको प्रदेश.१-०१-००१ख ४७०५ नम्बरको बसको ठक्करबाट पैदलयात्री सोही महानगरपालिका-५ बस्ने ९२ वर्षीय दिल बहादर खत्रीको बुधबार दिउँसो मृत्यु भएको छ । ठक्करबाट गम्भीर घाइते भएका उनको विराट नर्सिङ होम विराटनगरमा उपचारको क्रममा मृत्यु भएको हो । बस चालकलाई प्रहरीले नियन्त्रणमा लिएको छ ।

​म्याग्दी, मालिका गाउँपालिका-५ ठूलो ढाटरस्थित सडकमा दरवाङबाट रून्मतर्फ जाँदै गरेको ग.२ च ४३९२ नम्बरको  बोलेरो अनियन्त्रित भई सडकबाट करिब ४० मिटर तल खसेर बुधबार दिउँसो दुर्घटना हुँदा बोलेरोमा सवार सोही गाउँपालिका-५ रून्म बस्ने ४३ वर्षीया छनदेवी फगामीको घटनास्थलमै मृत्यु भएको छ । साथै दुर्घटनामा घाइते भएका बोलेरो चालक समेत ३ जनाको  फिस्टेल अस्पताल पोखरामा थप उपचार भइरहेको छ ।

​बाजुरा, स्वामीकार्तिक खापर गाउँपालिका-१ बर्कुस्थित सडकमा जोरूबाट पिलुचौरतर्फ आउँदै गरेको भे.००१ त ०४८१नम्बरको ट्याक्टर अनियन्त्रित भई बुधबार दिउँसो दुर्घटना हुँदा ट्याक्टरमा सवार सोही ठाउँ बस्ने २७ वर्षीय पदम बुढाको घटनास्थलमै मृत्यु भएको छ । साथै दुर्घटनामा घाइते भएका ट्याक्टरमा सवार १ जनाको बर्कु स्वास्थ्य चौकीमा उपचार भइरहेको   छ । ट्याक्टर चालकलाई प्रहरीले नियन्त्रणमा लिएको छ ।

​रूपन्देही, बुटवल उपमहानगरपालिका-११ स्थित सडकमा होराईजन चोकबाट योगिकुटीतर्फ जाँदै गरेको लु.९७ प १६४१ नम्बरको मोटरसाइकलको ठक्करबाट पैदलयात्री सोही उपमहानगरपालिका-११ कैलाशपथ बस्ने ५० वर्षीया लोक कुमारी रेग्मीको मृत्यु भएको छ । दुर्घटनामा गम्भीर घाइते भएकी उनको चौराहा अस्पतालमा उपचारको क्रममा मृत्यु भएको हो । साथै दुर्घटनामा घाइते भएका मोटरसाइकल चालकको सोही अस्पतालमा उपचार भइरहेको छ ।

​धनुषा, गणेशमान चारनाथ नगरपालिका-६ चारनाथ पुलस्थित सडकमा ग.१ ख ९७१६ नम्बरको बसमा प्रदेश.२-०२-००४ प ४०४४ नम्बरको मोटरसाइकल ठक्कर खाई बुधबार राति दुर्घटना हुँदा मोटरसाइकल चालक सोही नगरपालिका-७ गोदार बस्ने ३७ वर्षीय राजेश महत्तोको मृत्यु भएको छ । दुर्घटनामा गम्भीर घाइते भएका उनको प्रादेशिक अस्पताल जनकपुरमा उपचारको क्रममा मृत्यु भएको हो । बस चालकलाई प्रहरीले नियन्त्रणमा लिएको छ ।

​कालीकोट, खाँडाचक्र नगरपालिका-२ थामकोटस्थित सडकमा नेपालगंजबाट कालिकोट मेयरखोलातर्फ जाँदै गरेको भे.१ ख ४३२६ नम्बरको ट्रक सडकबाट करिब ५ सय मिटर तल खसेर बुधबार राति दुर्घटना हुँदा चालक दैलेख घर भएका ४० वर्षीय मान बहादुर मगरको घटनास्थलमै मृत्यु भएको छ ।

​बर्दिया, राजापुर नगरपालिका-६ मानपुर टपरास्थित सडकमा राजापुरबाट नेपालगंजतर्फ जाँदै गरेको भे.१ ज १४४३ नम्बरको इभी गाडी अनियन्त्रित भई दुर्घटना हुँदा गाडीमा सवार सोही ठाउँ बस्ने ४१ वर्षीया चम्फी थरूनीको मृत्यु भएको छ । बुधबार बिहान भएको उक्त दुर्घटनामा गम्भीर घाइते भएकी उनको नेपालगंज मेडिकल कलेज शिक्षण अस्पताल कोहलपुरमा थप उपचारको क्रममा बुधबार राति मृत्यु भएको हो । गाडी चालकलाई प्रहरीले नियन्त्रणमा लिएको छ ।

दुर्घटनाका सम्बन्धमा प्रहरीले आवश्यक अनुसन्धानगरिरहेको जानाकारी नेपाल प्रहरी प्रधान कार्यालय – प्रहरी महानिरीक्षकको सचिवालयले दिएको छ ।